चौदण्डीगढीमा अन्तरक्रिया कार्यक्रम गरी सहकारी दिवस मनाईयो

बेल्टार। चौदण्डीगढी नगरपालिका सहकारी शाखाले आज ६८ औं सहकारी दिवसको अवसरमा मर्यादित सहकारीः सम्मुनत समाज भन्ने मूल नाराका साथ अन्तरक्रिया कार्यक्रम गरी मनाएको छ ।

सहकारी संस्थाका अध्यक्ष र व्यवस्थापकको सहभागीतामा भएको अन्तरक्रिया कार्यक्रममा व्यवहारीक कुरालाई विर्सिएर कानूनी रुपमा मात्र अगाडी बढ्दा सहकारी संचालनमा कठीनाई पर्ने सहभागीहरुको भनाई छ । सहकारी ऐन, नियमावली र विनियम जान्दा जान्दै पनि ऋण लगानीको सन्दर्भमा व्यवहारीक कुरालाई हेर्दा लगानी उठाउन समस्या परेकोले ऋण उठाउनका लागि नगरपालिकालाई सहजीकरण गरीदिन अनुरोध समेत गरेको छन ।

अन्तरक्रिया कार्यक्रममा चौदण्डीगढी नगरपालिकामा रहेको सहकारी संस्थाहरुको अवस्था र व्यवस्थित गर्न स्यम सहकारी संस्थाहरु र नगरपालिकाले खेल्नुपर्ने भुमिकाको विषयमा थप छलफल भएको छ ।प्राचिन काल देखी नै नेपालमा सहकारीको विकास पर्म ढिकुटी धर्म भकारी नामबाट शुरुवात भएको पाईन्छ । नेपालमा वि.स.२०१३ चैत्र २० मा बखान सिंह गुरङ्गको नेतृत्वमा चितवनमा गठन भएको बखान सहकारी पहिलो सहकारी मानिन्छ भने  हरेक वर्ष चैत्र २० मा राष्ट्रिय सहकारी दिवस मनाईदै आएको छ ।

यता चौदण्डीगढी नगरपालिकामा रहेका सहकारीहरुलाई थप व्यवस्थित गर्नका लागि प्रमुख प्रशासकीय अधिकृतको संयोजकत्वमा रहेको सहकारी अनुगमन समितिले यस आर्थिक वर्ष २०८१/८२ मा ११ वटा सहकारी संस्थाहरुको सघन अनुगमन गरी प्रतिवेदन समेत सहकारी संस्थाहरुलाई बुझाएको छ । अनुगमनका क्रममा देखिएको चार खाता व्यवस्थापन, ऋण लगानीमा देखिएको कमजोर प्रकृया, दोहोरो सदस्यता साथै संचालक समिति, ऋण लगानी उपसमिति, लेखा समितिको बैठकलाई प्रभावकारी बनाउदै सहकारी संस्थाहरुलाई थप व्यवस्थित गर्ने विषयबस्तुमा चौदण्डीगढी नगरपालिका सामाजिक शाखा प्रमुख नवराज बरालले सहजीकरण गर्नुभएको थियो।

चौदण्डीगढी नगरपालिकामा ६० वटा सहकारी दर्ता छन भने १४ वटा सहकारी निस्कृय रहेको जनाईएको छ । निस्कृय सहकारी संस्थालाई खारेजीको प्रकृयामा लैजाने र बाकी सहकारीहरुलाई थप व्यवस्थित गर्नका सघन अनुगमनलाई जोड दिदै अनुगमनमा देखिएका कमीकमजोरीलाई सुधार गरी अगाडी बढ्न समनात्मक भुमिका खेल्ने सहकारी शाखा प्रमुख बविता परियारले बताउनु भयो ।

अन्तरक्रिया कार्यक्रममा सहकारी ऐन, नियमावलीको परिधिमा रहेमा मात्र सहकारी संचालन गर्नपर्ने साथै बैशाक १५ गतेभित्र भाका नाघेको ऋणको बिवरण संचालन सिमितिबाट निर्णय गराएर सहकारी शाखामा बुझाउन निर्देशन समेत दिईएको छ । कार्यक्रममा  ५० जनाको सहभागीता रहेको थियो ।