प्रथम पोखरा कप पुरूष राष्ट्रिय ह्याण्डबल प्रतियोगिता कोशी प्रदेशको सुरुवाती जीत

पोखरा। यही चैत ३ गते (आज) बाट सुरु भएको प्रथम पोखरा कप पुरूष राष्ट्रिय ह्याण्डबल प्रतियोगितामा सहभागी कोशी प्रदेशको टिमले आफ्नो पहिलो खेलमा जित हाँसिल गरेको छ ।

आइतबार भएको आफ्नो पहिलो खेलमा कोशी प्रदेशले सुदुरपश्चिम प्रदेशलाई १९ का बिरुद्ध २२ गोल गर्दै जित हासिल गरेको राष्ट्रिय ह्याण्डबलका कोच विन्दा थापाले जानकारी दिनु भयो । प्रतियोगिता अनुसार सोमबार आफ्नो दोस्रो खेलमा कोशी प्रदेशले कर्णाली प्रदेश र गण्डकी प्रदेशको सामना गर्ने छ ।

गण्डकी प्रदेश ह्याण्डबल संघको आयोजनामा तथा प्रदेश खेलकुद परिषद गण्डकीको सहकार्यमा प्रथम पोखरा कप पुरुष राष्ट्रिय ह्याण्डबल प्रतियोगिता आज चैत ३ गते उद्घाटन गरिएको हो । प्रतियोगिता यही ५ गते सम्म संचालन हुने आयोजकले जनाएको छ । नवौं राष्ट्रिय खेलकुद प्रतियोगिता सम्पन्न भएको साढे २ वर्ष पछि उक्त प्रतियोगिता हुन लागेको हो ।

पोखरा रंगशालास्थित बहुउद्देश्यीय कभर्डहल र पोखरा ह्यान्डबल एकेडेमीमा लिगकम नक आउटका आधारमा सञ्चालन हुने प्रतियोगितामा पोखरा ह्यान्डबल कप उपाधि विजेता टिमले नगद १ लाख, उपविजेताले नगद ५० हजार र तेस्रो हुने टिमले नगद ३० हजारका साथमा ट्रफी, मेडल तथा प्रमाणपत्र प्राप्त गर्ने छन् ।

त्यस्तै प्रतियोगितामा  उत्कृष्ट गोलरक्षक, उत्कृष्ट खेलाडी र सर्वाधिक गोलकर्तालाई नगद ५–५ हजारका साथमा ट्रफी तथा प्रमाणपत्र प्रदान गरिने छ ।
प्रतियोगिता सम्पन्न गर्न करिव १४ लाख खर्च हुने गण्डकी प्रदेश ह्याण्डबल संघले जनाएको छ । प्रतियोगितालाई कास्की जिल्ला ह्याण्डबल संघले प्राविधिक सहयोग गरेको छ ।

कोशी प्रदेशबाट प्रवत गुरुङ टिम प्रशिक्षकका रुपमा सहभागी हुनु भएको छ भने प्रतियोगितामा ११ जना खेलाडी सहभागी भएका छन । कोशी प्रदेशको प्रतिनिधित्व गर्दै उदयपुर सदरमुकाम गाईघाट बाट ६ जना, उदयपुरकै चौदण्डीगढी नगरपालिकाबाट ३ जना र बिराटनगरबाट २ खेलाडी सहभागी भएका छन ।