गाईघाट । त्रियुगा नगरपालिकाको भवन बनेको ६ महिना नवित्दै चुहिन थालेको छ । नगरपालिकाको मुख्य भवनको तेस्रो तला चुहिएको हो । २०७५ पुस महिनामा निर्माण सम्पन्न गरी कार्यालय संचालन गरेको भवन चुहिदा प्राविधिक शाखा, योजना, उद्यम, प्रधानमन्त्री रोजगार घरनक्सा शाखाहरु प्रभावित भएका छन ।
सिराहाको बालकी कन्टक्ससनले भ्याट सहित २८ लाखमा भवन निर्माणको काम गरेको नगरपालिकाका प्रमुख ईन्जिनियर गोपाल रायले जानकारी दिए ।
स्थानीय सेवाग्राहीले भवन चुहिएपछि नगरपालिका भित्र छाता ओढेर सेवा लिनु पर्ने अवस्था सृजना भएको छ । वरिपरि इटाको वाल र ट्रसमा जस्ता लगाई निर्माण गरिएको तलाको सबै पानी प्राविधिक फाँट भित्र पस्दा प्राविधिक शाखाको कम्प्युटर लगाएतका कागजातहरु भिजेर क्षति पुगेको छ । प्राविधिक शाखामा पानी पसेपछि पानी पस्ने ढोकामा बोरामा बालुवा भरेर पानी रोक्न प्रयास गरिएको छ । आफैले स्टमेट, डिजाईन गरि आफैले रेखदेखमा काम गरि राम्रो काम भयो भनि मुल्याकंन गर्ने प्राविधिककै टाउकोमा पानी चुहिएको घटनालाई छानविन गर्न एक समिति गठन गरेको त्रियुगा नगरपालिकाले जनाएको छ । वडा नम्बर १६ का वडा अध्यक्ष मान बहादुर राईको संयोजकत्वमा समिति गठनगरि भवन चुहिएको छानविन थालेको सूचना अधिकारी विश्वजीत राईले जानकारी दिए । ‘भवन चुहिएको छ, यो सम्पन्न भएपनि निर्माण व्यवसायीले नै मर्मत गर्नु पर्छ ।’ उनले भने ‘निर्माण व्यवसायीलाई पत्रचार गरेर मर्मत गर्न लगाउछौ ।’